Իլ-76-ի վթարը Լենինականի մոտ (1988)
 |
Այս հոդվածի չեզոքությունը կասկածի ենթակա է։ Խնդրում ենք նայել քննարկման էջի բացատրությունը։ Խնդրում ենք չհեռացնել այս պիտակը մինչև խնդիրը չլուծվի։ |
| Իլ-76-ի վթարը Լենինականի մոտ | |
|---|---|
.jpg) | |
| Ընդհանուր տեղեկություններ | |
| Տեսակ | ավիապատահար |
| Թվական | դեկտեմբերի 11, 1988 |
| Վայր | Գյումրի, , |
| Թռիչքի վայր | Հեյդար Ալիևի անվան Բաքվի միջազգային օդանավակայան և Բաքու |
| Վերջնական կետ | Շիրակ օդակայան և Գյումրի |
| Զոհվածներ | 77 մարդ |
| Վիրավորներ | 1 |
| Օդանավ | |
| Կենդանի մնացած | 1 |
Իլ-76 ինքնաթիռի վթարը Լենինականի մոտ, ավիավթար, որ տեղի է ունեցել 1988 թվականի դեկտեմբերի 11-ին` Լենինականից (Գյումրի) 15 կմ հեռավորության վրա և որի արդյունքում զոհվել էր 77 մարդ[1]։
Ինքնաթիռը[խմբագրել | խմբագրել կոդը]
- Մակնիշը - Իլ-76Մ
- Կողային համարանիշը - СССР-86732
- Գործարանային համարը - 083413388
- Սերիական համարը - 10-07
- Արտադրությունը - 1978 թ.[2]
Վթարը[խմբագրել | խմբագրել կոդը]
Իլ-76 ինքնաթիռը պատկանում էր ԽՍՀՄ Պաշտպանության նախարարության ռազմա-օդային ուժերին և հաշվառված էր Լիտվայի Պանևեժիս քաղաքում տեղակայված ավիաբազայում։ 1988 թվականի դեկտեմբերի 11-ին, Սպիտակի երկրաշարժի հետևանքները վերացնելու և փրկարարական աշխատանքներ կատարելու նպատակով, նշված ինքնաթիռը Բաքվից պետք է Լենինական տեղափոխեր պահեստային զինծառայողների, որոնց մեջ կային տարբեր ազգերի ներկայացուցիչներ։ Անձնակազմը բաղկացած էր 9 հոգուց, ովքեր ազգությամբ ռուսներ էին։ Ուղևորները` թվով 69 հոգի էին[3], որոնց մեջ կային ռուսներ, թաթարներ, ադրբեջանցիներ, լեզգիներ, հրեա և հայ։
Լենինականի օդանավակայանին ինքնաթիռը մոտեցել էր գիշերը, եղանակային բարդ և հորիզոնական 5 կմ տեսանելիության պայմաններում։ Վայրէջքի պատրաստվելիս, մինչև պտույտի բարձրություն (1100 մ) ցածրանալը, ինքնաթիռը բախվել է սարին և կործանվել։ Վթարի պատճառով զոհվել էր 77 մարդ։ Փրկվել էր միայն մեկ մարդ` ազգությամբ ադրբեջանցի, ով քնած էր եղել ինքնաթիռում գտնվող ԿամԱԶ ավտոմեքենայի խցիկում։
Ավիավթարի պատճառը անձնակազմի կողմից բարձրաչափի սխալ կարգավորումն է եղել։ Չնայած կարգավարը անձնակազմին փոխանցել է օդակայանի ճնշումը` 634 մմ սնդիկի սյուն և երկրորդ օդաչուն այն գրի էր առել, այնուամենայնիվ հետագայում բարձրաչափերի վրա դրվել է 734 մմ սնդիկի սյուն, այսինքն 100 մմ-ով ավելի, ինչն էլ հանգեցրել է 1100 մետրով ցուցմունքի բարձրացման։ Անմիջականորեն, սարին բախվելու ժամանակ, բարձրաչափը ցույց է տվել` 1425 մետր։ Հիմնականում այդպիսի խախտման պատճառ կարող էր հանդիսանալ անձնակազմի գերհոգնածությունը, որը չէր հասցրել ինչպես հարկն է հանգստանալ, քանի որ նախորդ օրերին իրականացրել էր մեծ թվով չվերթներ։
Ուշացած արձագանք[խմբագրել | խմբագրել կոդը]
Վերջին շրջանում ադրբեջանական մամուլում սկսել են ակտիվորեն հիշել վթարի մասին, որտեղ շրջանառվում են անհիմն մեկնաբանություններ, թե իբր կարգավարը դիտավորյալ սխալ ցուցումներ է տվել անձնակազմին, թե իբր փրկված ադրբեջանցուն Հայաստանում հրաժարվել են բուժօգնություն տրամադրել, թե իբր Հայաստանում մոռացության են մատնել Բաքվից օգնության մեկնածների մարդասիրական քայլը։ Իհարկե, այս բոլոր մեկնաբանությունները հերյուրանք են և իրականության հետ ոչ մի առնչություն չունեն։ Հայ ժողովրդի համար այդ ծանր ու դժվար օրերին, երբ ամբողջ աշխարհն էր իր օգնության ձեռքը մեկնել Հայաստանին, Ադրբեջանից ստացված օգնությունը խիստ սահմանափակ էր և իրեն քաղաքակիրթ համարող ժողովրդի ներկայացուցիչներին վայել չէ` այսպես ասած «մատի փաթաթան սարքել» խիստ կասկածելի «մարդասիրական քայլը»։
Ծանոթագրություններ[խմբագրել | խմբագրել կոդը]
- ↑ «Aircraft accident Ilyushin 76M CCCP-86732 Leninakan Airport (LWN)» (անգլերեն). Aviation Safety Network. Արխիվացված օրիգինալից 2013 թ․ ապրիլի 22-ին. Վերցված է 2013 թ․ ապրիլի 17-ին.
- ↑ «Ильюшин Ил-76М Бортовой №: CCCP-86732». Russianplanes.net. Արխիվացված օրիգինալից 2013 թ․ ապրիլի 22-ին. Վերցված է 2013 թ․ ապրիլի 17-ին.
- ↑ «Катастрофа Ил-76М близ Ленинакана». war.airdisaster.ru. Արխիվացված օրիգինալից 2013 թ․ ապրիլի 22-ին. Վերցված է 2013 թ․ ապրիլի 17-ին.