Հաննայի հայրը օլիմպիական խաղերի եռակի մեդալակիր սահնակորդ Մարկուս Պրոկն է[3]։ Հաննայի ավագ քույրը՝ Նինան, նույնպես զբաղվում էր սահնակային սպորտով, բայց Ինսբրուկի պատանեկան օլիմպիական խաղերում մենապայքարում 4-րդ տեղը գրավելուց և Իգլսում անցկացված աշխարհի պատանեկան առաջնությունում փոխանցումավազքում ոսկե մեդալ նվաճելուցհետո ավարտել է իր մարզական կարիերան[3][4][5]։։
Հաննան սկսել է սահնակային սպորտով զբաղվել՝ հետևելով իր ավագ քրոջը՝ Նինային[3]։ Իր դեբյուտային մրցաշրջանում՝ 2015 թվականին, աշխարհի պատանեկան գավաթի խաղարկության շրջանակում Օբերհոֆում և Վինտերբերգում անցկացված մրցումներում նա երկու անգամ կանգնեց պատվո հարթակի երրորդ աստիճանին[6], իսկ 2017 թվականին Իգլսում կայացած մրցումներում իր առաջին հաղթանակը տարավ։ Բացի այդ, մասնակցեց Օբերհոֆում անցկացված Եվրոպայի պատանեկան առաջնությանը, որտեղ մենապայքարում նվաճեց արծաթե մեդալ և 4-րդ տեղն զբաղեցրեց փոխանցումասահքում[6]։
2017 թվականի նոյեմբերի 18-ին նա նշեց իր դեբյուտը և վաստակեց իր առաջին միավորները աշխարհի մեծահասակների գավաթի խաղարկությունում, երբ Ինսբրուկում կայացած մրցումներում 22-րդ տեղը գրավեց մենապայքարում[7]։ Նույն թվականին մասնակցեց նաև Իգլսում կայացած աշխարհի մեծահասակների առաջնությանը, որտեղ զբաղեցրեց 18-րդ տեղը[6] .
2018 թվականին Հաննան մասնակցեց Փհենչհանի օլիմպիական խաղերին, որտեղ մենասահքում նա տասնյոթերորդն էր[8]։ Այդ նույն տարվա հունվարի 14-ին նա առաջին անգամ բարձրացավ աշխարհի մեծահասակների գավաթի խաղարկության պատվո հարթակին՝ գրավելով 3-րդ տեղը Օբերհոֆում կայացած փոխանցումասահքի մրցումներում։ Այստեղ նա իր թիմակիցներ Ռայնհարդ Էգերի, Պետեր Պենցի և Գեորգ Ֆիշլերի հետ պարտվեց միայն Գերմանիայի և Լատվիայի թիմերին[9]։ 2019 թվականի հունվարի 5-ին աշխարհի գավաթի խաղարկության՝ Քյոնիգսզեում կայացած մրցափուլի մենասահքի մրցումներում զբաղեցրեց 3-րդ տեղը[10]՝ զիջելով միայն գերմանուհի Ջուլիա Տաուբիցին և ամերիկուհի Ամար Բրիչերին[11]։ Այդ նույն տարում Վինթերբերգում անցկացված աշխարհի առաջնությունում զբաղեցրեց 14-րդ տեղը սպրինտ մրցաձևում, 17-րդը՝ մենասահքում, ինչպես նաև արծաթե մեդալ նվաճեց փոխանցումասահքում՝ իր թիմակիցներ Ռայնհարդ Էգերի, Թոմաս Ստյուի և Լորենց Կոլերի հետ ու պատվո հարթակ բարձրացավ Ռուսաստանի և Գերմանիայի թիմերի ընկերակցությամբ[12]։