Ֆուտբոլով զբաղվել սկսել է Նարտկալայի ՄՊՄԴ-ում Փաշա Ռամազանովիչ Աղաբալիևի ղեկավարությամբ։ 14 տարեկան հասակում ընդգրկվել է «Արուան» տեղական ակումբի կազմում, որը հանդես էր գալիս Ռուսաստանի առաջնության երրորդ դիվիզիոնում։ Այդտեղից մարզիչներ Ասլանբեկ Խանցևի և Վլադիմիր Կուրաշինովի խորհրդով տեղափոխվել է մոսկովյան «Լոկոմոտիվ» ակումբի դպրոց[2]։ Նա չի կարողացել ամրապնդել իր տեղը «երկաթուղայինների» կազմում և ուսումնառության ավարտին շարունակել է կարիերան Կալուգայի «Լոկոմոտիվում», բայց երկու ամիս անց դուրս է եկել թիմից ակումբի ղեկավարության հետ ընդհարման պատճառով[2]։ 2005 թվականի ամռանը միացել է երկրորդ դվիզիոնում հանդես եկող «Սպորտակադեմակումբին», որտեղ անցկացրել է 27 խաղ՝ խփելով 10 գոլ։ Արժանացել է Մարսելի «Օլիմպիկ» ակումբի մարզչական շտաբի ուշադրությանը և 2006 թվականին ստաժավորում անցել Ֆրանսիայում։ 2007 թվականի ամռանը ավարտվել է «Սպորտակադեմակումբի» հետ պայմանագրի ժամկետը, և նա տեղափոխվել է Նալչիկի «Սպարտակ» ակումբ։ Ռուսաստանի Պրեմիեր-լիգայում նորամուտը կատարել է օգոստոսի 5-ին՝ մասնակցելով 19-րդ տուրի՝ ԲԿՄԱ-ի դեմ տնային խաղին[3]։ «Սպարտակ» ակումբի կազմում իր առաջին գոլը խփել է 20 օր անց՝ օգոստոսի 26-ին կայացած «Դինամո» ակումբի դեմ խաղում[4]։ 2009 մրցաշրջանի առաջին կեսը վարձավճարով անցկացրել է Մախաչկալայի«Անժի» ակումբում[5], որտեղ գոլ է խփել առաջին իսկ խաղում՝ գրավելով «Նիժնի Նովգորոդի» դարպասը[6], սակայն դրանից հետո հիմնականում դուրս է եկել փոխարինման և այլևս աչքի չի ընկել՝ ընդհանուր առմամբ ակումբում անցկացնելով 13 հանդիպում։ 2009 թվականի օգոստոսին վերադարձել է Նալչիկ, որտեղ մինչև մրցաշրջանի ավարտը հանդես է եկել երիտասարդական կազմերի առաջնությունում։ 2010 թվականի մրցաշրջանն անցկացրել է Աստրախանի «Վոլգար» ակումբում, խաղացել է 27 խաղ և խփել 3 գոլ։ 2011 թվականի մարտին վերադարձել է «Սպարտակ Նալչիկ»[7]։ Հուլիսի 17-ին Ռուսաստանի գավաթի խաղարկության 1/16 եզրափակչի՝ Վլադիմիրի «Տորպեդո» ակումբի դեմ խաղում կանխամտածված կերպով հետևից ոտքով խփել է Վալերի Մալիշևին, ինչից հետո հեռացվել է դաշտից[8][9]։ Հետագայում որակազրկվել է գավաթային չորս խաղերով։